Mörg stjórnarmynstur í spilunum

Reiknað er með því að viðræður Framsóknar- og Sjálfstæðisflokksins um áframhaldandi stjórnarsamstarf haldi áfram á næstu dögum. Formenn flokkanna ræddust saman í gær en engir formlegir fundir hafa þó verið boðaðir. Ríkisstjórnin fundar á morgun. Formenn tvegga stærstu stjórnarandstöðuflokkanna segja marga möguleika vera í spilunum.

„Staðan er mjög óljós og óviss," sagði Steingrímur J. Sigfússon, formaður Vinstri grænna, í samtali við Vísi. „Það er ýmislegt í spilunum en engar formlegar viðræður í gangi af okkar hálfu. Hins vegar er eðlilegt að menn tali saman."

Greint var frá því í Morgunblaðinu í morgun að Ingibjörg Sólrún Gísladóttir, formaður Samfylkingarinnar, hafi sett sig í samband við forystu Sjálfstæðisflokksins og þreifað á möguleikum á samstarfi. Steingrímur segir þetta hafa komið sér mjög á óvart. „Ég var mjög hissa þegar ég las þetta."

Í samtali við Vísi sagði Ingibjörg það ekki rétt hjá Morgunblaðinu að hún hafi leitað eftir viðræðum við Sjálfstæðisflokkinn. „Það er ekki rétt að ég hafi leitað eftir formlegum viðræðum. Það eru allir að tala saman. Hins vegar eru engar formlegar né óformlegar viðræður í gangi af okkur hálfu við Sjálfstæðisflokkinn."

Ríkisstjórnin fundar á morgun og munu formenn Framsóknarflokksins og Sjálfstæðisflokksins væntanlega nýta tímann til frekari viðræðna. Eins og staðan er núna liggur þó ekkert fyrir hvort flokkarnir tveir nái saman. Jón Sigurðsson, formaður Framsóknarflokksins og Valgerður Sverrisdóttir, utanríkisráðherra, lýstu því bæði yfir fyrir kosningar að Framsóknarflokkurinn ætti að draga sig út úr ríkisstjórn ef hann fengi slæma útreið.

Nokkur önnur stjórnarmynstur koma til greina nái framsóknar- og sjálfstæðismenn ekki saman um áframhaldandi samstarf. Helst er rætt um tveggja flokka stjórn annars vegar Sjálfstæðisflokksins og hins vegar Vinstri grænna eða Samfylkingar. Þá hefur einnig komið til tals að Samfylking, Vinstri grænir og Framsókn myndi saman ríkisstjórn en flokkarnir störfuðu saman í R-listanum undir stjórn Ingibjargar Sólrúnar Gísladóttur.