Samþykkt á fundi OR að fallast á tillögu borgarráðs

Samþykkt var einróma á fundi stjórnar Orkuveitu Reykjavíkur í dag að fallast á tillögu borgarráðs að falla frá hinum umdeilda samruna Reykjavik Energy Invest og Geysir Green Energy sem samþykktur var á stjórnarfundi Orkuveitunnar þann 3. október.

Enn fremur var Bryndísi Hlöðversdóttur, stjórnarformanni Orkuveitunnar, falið að undbúa eigendafund hjá Okruveitunni ásamt því að ræða við aðra hluthafa REI um málið, þar meðal Geysir Green Energy. Á Bryndís að leggja fram tillögur þar að lútandi fyrir næsta stjórnarfund OR.

Í bókun stjórnar Orkuveitunnar kemur fram að hún falli frá samþykki sínu sem veitt var hinum umdeilda fundi er varðar það:

b) að Orkuveita Reykjavíkur samþykki að hlutir félagsins í Hitaveitu Suðurnesja hf., að bókfærðu verði kr. 8.674.611.-, verði lagðir inn sem hlutafé í REI á genginu 2,7 og fái hlutafé í REI að nafnvirði kr. 3.209.276 sem undanfari samruna REI og Geysis Green Energy.

c) að Orkuveita Reykjavíkur samþykki samning við REI um aðgang að tækniþjónustu o.fl., dags. 3. okt. sl.

d) að Orkuveita Reykjavíkur samþykki samruna REI við Geysi Green Energy hf. skv. fyrirliggjandi samningi um breytingar á eignarhaldi REI og samruna REI við Geysi Green Energy .

Áskilur stjórn OR sér rétt til að taka nýjar ákvarðanir varðandi ofangreind málefni í samræmi við síðari ákvarðanir stjórnarinnar og væntanlegs eigendafundar OR, að fengnum tillögum stjórnarformanns OR.

Þá beinir stjórn Orkuveitunnar því til stjórnarmanna í REI að ekki verði teknar neinar ákvarðanir í stjórn REI á grundvelli fundarsamþykktar frá 3. október nema að fengnu fyrirfram samþykki stjórnar OR, en boðaður framhaldsaðalfundur REI verður haldinn 17. nóvember.

Enn fremur er stefnt að því að áður en einstakar ákvarðanir eru teknar um framhald REI-málsins að bera slíkar tillögur undir aukafund eigenda í OR. Jafnframt er stjórnarformanni falið að hafa samráð við fulltrúa eigenda um það hvenær af slíkum fundi geti orðið.

Til þess að tryggja hagsmuni OR gagnvart öðrum hluthöfum í REI samþykkir stjórn OR að OR sé heimilt að kaupa nýtt hlutafé í REI að fjárhæð kr. 2.600.000.000 á genginu 1.0 sem staðgreiðist fyrir 1. febrúar 2008, eða fyrr, sbr. áskriftarsamning sem dagsettur er 6. okt. 2007.

Ekki hætt við útrás

Aðspurð segist Bryndís ánægð með niðurstöðuna og að viðræður við Geysi Green Energy og aðra hluthafa í REI leggist vel í sig. „Það er að mörgu að huga og út frá fyrri atvikum þessa máls er mikilvægt að vanda vel til verka og að ákvarðanir séu teknar að vel athugðu máli," segir Bryndís.

Bryndís ítrekar að það að hverfa frá samrunanum við Geysi Green Energy feli ekki í sér að Orkuveitan ætli að hætta í útrás eða leggja niður starfsemi REI. Hins vegar þurfi að taka næstu skref með hagsmuni Orkuveitunnar að leiðarljósi.