Fimmtán rjúpur veiddar í gær samkvæmt veiðidagbók UST

Fimmtán rjúpur veiddust í gær samkvæmt fyrstu tölum úr rafrænni veiðidagbók sem veiðistjórnunarsvið Umhverfisstofnunar heldur utan um.

Fram kemur í frétt frá Umhverfisstofnun að samkvæmt dagbókinni hafi tæplega 0,65 rjúpur veiðst á klukkustund fyrsta veiðidaginn sem var í gær. Það er um 70 prósent af því sem hún var fyrsta daginn árið 2005. Þá reyndist veriðin 0,94 rjúpur á klukkustund. Umhverfisstofnun gerir þó ráð fyrir að skráningum fyrir fyrsta daginn fjölgi síðar en þó gefi þetta nokkra vísbendingu um veiðarnar.

Rafræna veiðidagbókin er skilavefur veiðimanna þar sem þeir geta skráð veiði dagsins. Gögnin eru persónurekjanleg en Umhverfisstofnun mun einungis nota gögnin almennt og án þess að rakið verði til persónu. Sem dæmi má nefna að hægt verður að sjá hversu margar rjúpur veiðast daglega og hvernig veiðin dreifist eftir veiðisvæðum.

Rjúpnaveiðikvótinn í ár er 38 þúsund fuglar og eru veiðar aðeins heimilaðar í nóvembermánuði, það er frá fimmtudegi til sunnudags í viku hverri. Er þetta gert vegna bágs ástands rjúpnastofnsins.