Federline biðst afsökunar

Rapparinn Kevid Federline, sem er kannski frægastur fyrir að hafa verið kvæntur Britney Spears, hefur beðið kokka á skyndibitastöðum Bandaríkjanna afsökunar á auglýsingu sem hefur farið fyrir brjóstið á þeim. Í auglýsingunni er Kevin að steikja franskar kartöflur en dreymir dagdrauma á meðan. Formaður félags starfsfólks á veitingahúsum, segir að auglýsingin sé gróf móðgun við þær 12,8 milljónir manna sem vinni á veitingahúsum landsins.

Í afsökunarbeiðni sinni segir Kevin að hann hafi fyrst og fremst litið á auglýsinguna þannig að gert hafi verið grín að honum sjálfum. Hann hafi tekið að sér að leika í henni, í von um að það opnaði honum leið inn í Hollywood. Hann segist harma mjög ef einhverjum hafi sárnað.