Óttast að vettvangsferðir leggist af

Fræðslustjóri óttast að vettvangsferðir grunnskólanna leggist af ef grunnskólum verði gert að greiða fyrir þær. Dæmi eru um að slíkar ferðir kosti nemendur allt að 16 þúsund krónur.

Menntamálaráðuneytið hefur séð sig knúið til að senda öllum grunnskólum landsins bréf þar sem 33. grein grunnskólalaga er áréttuð. Eins og við greindum frá í fréttum á dögunum þá snýst málið aðallega um skilgreiningu á viðbót við lagagreinina sem tók gildi um síðustu áramót og hljóðar svo:

,,Óheimilt er að taka gjald af nemendum vegna ferðalaga sem flokkast undir vettvangsnám eða eru að öðru leyti hluti af skyldunámi nemenda."

Innan menntasviðs Reykjavíkurborgar er nú verið að fara yfir það hversu margar ferðir skólarnir á höfuðborgarsvæðinu fara og hve margar þeirra eru skilgreindar sem hluti af skyldunámi. Þá er menntasviðið einnig að láta kanna hvernig beri að skilja nýju lögin.

Menntamálaráðuneytið segir hins vegar að allar ferðir sem farnar eru á skólatíma skuli vera nemendum að kostnaðarlausu og að svo hafi verið alla tíð en um það snýst deilan.

Ragnar Þorsteinsson fræðslustjóri Reykjavíkurborgar óttast að ef skilgreining menntamálaráðuneytisins verði ofan á þá muni skólaferðum fækka verulega

Á höfuðborgarsvæðinu eru skipulagðar margar ferðir innan grunnskólanna sem rukkað er fyrir. Þannig fara fjölmargir skólar í skíðaferðir, ferðir að Reykjum og haustferðir en litið svo á að þessar ferðir séu skemmtiferðir en ekki hluti af skyldunámi.

Sumar af þessum ferðum, eins og til dæmis að Reykjum, kosta nemendur um 16 þúsund krónur og finnst mörgum foreldrum það ansi stór biti að kyngja. Ragnar segir hins vegar geta fullyrt að barni sé aldrei neitað um að fara í ferð vegna þess að það á ekki fyrir henni. Það sé alltaf fundin lausn á slíku.