VG vilja ekki sambýli fyrir geðfatlaða

Fulltrúar Vinstri-Grænna í skipulagsráði Reykjavíkurborgar greiddu atkvæði gegn byggingu sambýlis fyrir sex geðfatlaða einstaklinga við Holtaveg í morgun. Fulltrúar F-lista voru einnig á móti byggingunni en þeir hafa ekki atkvæðisrétt. Svandís Svarvarsdóttir, fulltrúi VG í ráðinu, mótmælti byggingunni á þeirri forsendu að um grænt svæði væri að ræða.

Björk Vilhelmsdóttir, fulltrúi Samfylkingarinnar í skipulagsráði, segir að ákvörðun um byggingu hússins hafi verið tekin þrátt fyrir mikil mótmæli íbúa. Þeir sem standi að samþykktinni telji að uppbygging húsnæðis fyrir geðfatlaða sé það mikilvægasta sem staðið væri frammi fyrir. Þá muni væntanlegt íbúðahús ekki standa á grænu svæði, heldur á lóð sem ekki hafi verið nýtt á neinn hátt.

Björk segir að Reykjavíkurborg hafi verið að taka við því verkefni frá ríkinu að tyggja 80 geðfötluðum einstaklingum búsetu. Ekki sé ljóst hver afstaða VG og Frjálslyndra verði þegar það þurfi að byggja upp almennilegt húsnæði fyrir þennan hóp. Björk segist ekki vilja ásaka fulltrúa VG og Frjálslyndra um að vera á móti geðfötluðum. En þau hafi ekki verið tilbúin til að standa með geðfötluðum. Því sé hún gersamlega miður sín yfir.

Hanna Birna Kristjánsdóttir segir að bygging hússins hafi lengi staðið til og að komið hafi verið til móts við sjónarmið íbúa í nágrenninu. Til dæmis hafi upphaflega staðið til að byggja tvö hús fyrir samtals tólf einstaklinga en þeim hafi verið fækkað niður í eitt vegna athugasemda. Hanna Birna segir að talsmenn Öryrkjabandalagsins leggi mikla áherslu á að skjólstæðingar sínir fái búsetu í nágrenni við grænt svæði og reynt hafi verið að verða við því.

Hanna Birna óttast ekki að íbúar á svæðinu verði fyrir ónæði vegna sambýlisins. „Það kemur nánast aldrei fyrir að það sé kvartað undan sambýlum. Slíkt bara gerist ekki," segir Hanna Birna.