Lést í bílslysi í Reykhólasveit

Ökumaðurinn sem slasaðist alvarlega í umferðarslysinu sem átti sér stað á mánudaginn var við bæinn Klukkufell í Reykhólasveit er látinn. Hinn látni var tvítugur karlmaður af erlendu bergi brotinn. Lögreglan á Vestfjörðum rannsakar tildrög slyssins.

Í tilkynningu frá lögreglu segir að maðurinn, sem var einn í bifreiðinni, hafi hlotið alvarlega áverka, meðal annars á höfði. Hann var meðvitundarlaus þegar björgunaraðilar komu á vettvang og komst aldrei til meðvitundar.

„Svo virðist sem ökumaðurinn hafi misst stjórn á bifreiðinni og hún runnið út af veginum, vinstra megin miðað við akstursstefnuna og oltið þar nokkrar veltur uns hún stöðvaðist," segir í tilkynningunni. Yfirborð vegarins, þar sem slysið varð, er bundið slitlagi. Að sögn lögreglu voru akstursskilyrði góð og engin hálka á veginum.