Segir Kompás þátt ósmekklegan

Einar Gautur Steingrímsson, lögmaður mannsins sem Kompás fjallaði um í þætti sínum í gær, segir að umbjóðandi sinn kannist ekki við tvær þeirra stúlkna sem fjallað var um í þættinum. Þær hafi heldur ekki kannast við hann þegar myndbending fór fram hjá lögreglunni.

Einar segir að umbjóðandi sinn hafi átt samskipti við eina þeirra sem hann segir hafa verið með eðlilegum hætti. Einar segir að í þættinum sé gefið í skyn að ákæran á hendur umbjóðanda sínum lúti að einhverju verra og notuð séu óviðurkvæmileg orð sem samrýmist ekki ákæruskjali. Varðandi fjórðu stúlkuna sem nefnd er í þættinum sé sakarefnið enn minna.

Einar Gautur segir að það hafi verið dómgreindarleysi hjá Kompás að gefa í skyn að vandamál stúlknanna verði rakin til samskiptanna við skjólstæðing sinn. Fyrir liggi að þau eigi allt aðrar rætur. Einar telur að vandamál stúlknanna eigi ekki að bera á torg í fjölmiðlum. Það sé ósmekklegt, jafnvel þótt foreldra hafi brostið dómgreind og látið taka viðtal við sig.