Fyrrum lögmaður Hudgens í mál við hana

Lögfræðingur Vanessu Hudgens, sem skaut upp á stjörnuhiminninn eftir að hafa leikið í sjónvarpsmyndinni High School Musical, hefur höfðað mál gegn henni. Lögfræðingurinn Brian Schall heldur því fram að Hudgens hafi fallist á að greiða honum fimm prósent af tekjum sínum í skiptum fyrir lögfræðiþjónustu hans frá árinu 2005.

Schall heldur því fram að leikkonan unga hafi síðan þénað yfir 300 milljónir íslenskra króna og telur lögfræðingurinn sig eiga rúmlega 9 milljónir inni hjá henni.

Vinsældir myndarinnar sem framleidd er af Disney komu á óvart en fyrirtækið framleiðir um 10 sambærilegar myndir á hverju ári. High School Musical 2 var sýnd vestanhafs fyrr í þessum mánuði og er væntanleg til Bretlands á föstudag. Myndirnar hafa gert Hudgens að stjörnu á örskömmum tíma.