Ráðherrar funda um Sundabraut á vegum Faxaflóahafna

Stjórn Faxaflóahafna fundar á morgun með forsætisráðherra, viðskiptaráðherra og samgönguráðherra um áhuga hafnaryfirvalda á því að taka að sér framkvæmd Sundabrautar. Kostnaðurinn getur verið á bilinu tuttugu til tuttugu og tveir milljarðar króna og yrði þetta langstærsta samgöngumannvirkið í einkaframkvæmd til þessa. Bæði forsætis- og samgönguráðherra fagna frumkvæðinu og líst vel á þessi áform.

Í gær samþykkti stjórn Faxaflóahafna yfir áhuga á því að koma að framkvæmdum við Sundabraut - annast fjármögnun og byggingu þessa mannvirkis frá Kollafirði að Sæbraut "...með öllum þeim mannvirkjum sem nauðsynleg eru, þ.m.t. mögulegum göngum... Málið þolir enga bið", - sagði í samþykkt stjórnarfundar.

Björn Ingi Hrafnsson formaður stjóranr Faxaflóahafna fagnar góðum viðbrögðum ríkisstjórnar við þessum hugmyndum. Hann telji helst að sátt verði um jarðgangnagerðina, sem nú er í umhverfismati. Heildarkosntaður við framkvæmdina geti numið 20 til 22 milljarða - þar af 16 milljarða í jarðgöngin. Frumkvæðinu er vel tekið af ríkinu og fagnar Geir Haarde, forsætisráðherra þessu frumkvæði. Hann segir að á morgun verði fundur með honum, viðskipta- og samgönguráðherra ásamt stjórnarfulltrúum Faxaflóahafna. Þar verði málið rætt.

Sturla Böðvarsson, samgönguráðherra fagnar einnig þessum hugmyndum og bendir á að nýleg breyting á vegalögum geri einkaframkvæmdir sem þessa mögulega. Þrátt fyrir jákvæðni í garð hugmyndarinnar bendir Sturla þó á að allar framkvæmdir séu útboðsskyldar, jafnvel þó þær séu einkaframkvæmdir, þannig að ekki sé hægt að slá því föstu að Faxaflóahafnir taki að sér verkið þó svo vilji til samstarfs sé ríkur.

Ekki er að sinni tekin afstaða til þess að hálfu Faxaflóahafna hvort gjaldtaka mæti kostnaði af þessari framkvæmd. Ákvörðun um það mál kemur til kasta ríkisvaldsins.