Nicole Kidman þráir að eignast barn

Nicole Kidman segir frá því í samtali við tímaritið Vanity Fair að hún hafi misst fóstur þegar hún var 23 ára gömul, en hún missti einnig fóstur árið 2001 stuttu eftir að fyrrverandi eiginmaður hennar, Tom Cruise, sótti um skilnað. Eftir fyrra fósturlátið þráði Kidman svo heitt að eignast barn að tveimur árum síðar ákváðu hún og Cruise að ættleiða. Kidman segist hafa þráð að eignast barn síðan hún var sautján ára gömul og að hún yrði afar sorgmædd ef það tækist ekki.

"Frá fyrstu mínútu vildi ég eignast börn með Tom og því var fósturlátið erfið reynsla. Ég hef ekki verið mikið fyrir að ræða þessi mál en einhvern tíman verður sagan sögð," segir Kidman.

Leikkonan sem nú er fertug er gift kántrýsöngvaranum Keith Urban. "Keith veit að ég þrái að eignast barn og hann er sjálfur að komast á þann stað."

Leikkonan viðurkennir að hún hafi verið einmana eftir skilnaðinn við Cruise og lýsir því að hún hafi farið ein upp á hótelherbergi eftir að hafa unnið óskarinn fyrir The Hours og ekki haft neinn til að fagna með.

"Ég mundi segja að þegar við Keith kynntumst hafi tvær einmana sálir fundið hvor aðra." Kidman segir hjónin hafa komist í gegnum mjög erfiða tíma en Urban fór í áfengis- og vímuefnameðferð nokkrum mánuðum eftir að þau giftu sig í fyrra. Nú vonast hún til að bjartari tímar séu framundan.