Ritstjóri DV ekki hafður með í ráðum

Sigurjón M. Egilsson, ritstjóri DV, var ekki hafður með í ráðum þegar ákveðið var að sameina fréttastofur DV, dv.is og tímaritsins Mannlífs. Þetta kom fram í máli hans í útvarpsþættinum Kvöldsögur á Bylgjunni með Önnu Kristine, sem einnig er starfsmaður DV.

Sameiningin á að taka gildi frá og með næstu áramótum. Hver miðill mun hafa áfram sinn eigin ritstjóra en Reynir Traustason verður yfirmaður fréttasviðs.

Í þættinum sagðist Sigurjón fyrst hafa heyrt af sameiningunni á fundi með Elínu Ragnarsdóttur, framkvæmdastjóra Birtings og útgáfufélags DV, í gær. Sagði hann ennfremur að þetta hafi að vissu leyti komið sér á óvart.

Þá sagðist Sigurjón ekki hafa mikla trú á sameiginlegum fréttastofum. Að hans mati hefur slíkt hingað til ekki gefist vel.