Fyrsta raforkan frá Kárahnjúkum

Miðlunarlón Kárahnjúkavirkjunar náði sinni mestu hæð fyrir viku og síðan hafa Landsvirkjunarmenn látið þrýsting byggjast upp í aðrennslis- og fallgöngum virkjunarinnar. Hann verður gríðarlegur því heildarfallhæð vatnsins á þessari fjörutíu kílómetra vegalengd frá Hálslóni og í stöðvarhúsið í Fljótsdal er 599 metrar. Neðst í fallgöngunum einn kílómetra inni í Valþjófsstaðarfjalli sáu menn í gær þrýstingsmælinn ná hæstu hæð og í dag var byrjað að hleypa vatni inn á vél númer tvö til reynslu. Vélin verður prófuð næstu daga en á mánudag er svo stefnt að því að setja hana á fulla ferð og hefja raforkuframleiðslu fyrir alvöru. Vél eitt hefur verið látin snúast undanfarna tvo mánuði en með raforku frá landskerfinu en nú er það að gerast í fyrsta sinn að vatn frá Kárahnjúkum framleiði raforku. Inni í stöðarhúsinu hafa menn verið að gera allt klárt síðustu daga fyrir þessi tímamót en aflvélarnar sex verða svo ræstar hver af annarri með viku til tíu daga fresti næstu vikur þar til virkjunin verður komin í full afköst upp úr áramótum. Raforkan fer til álvers Alcoa í Reyðarfirði sem samhliða verður keyrt upp í fullan rekstur.