Kærður fasteignasali undrast ásakanir

Erna Valsdóttir löggiltur fasteignasali undrast ásakanir Andrésar Pétur Rúnarsson. L 94, félag í eigu Andrésar, hefur kært Ernu til eftirlitsnefndar Félags Fasteignasala. Andrés sakar Ernu um að hafa í heimildarleysi haldið eftir greiðslum upp í ógreiddan reikning, vegna sölu fasteignar og kaupsamnings, sem gerður var fyrir L-94 ehf.

Forsaga málsins er sú að Erna seldi iðnaðarhúsnæði að Austurmörk í Hveragerði fyrir einkahlutafélag Andrésar Péturs, L-94 ehf. Við uppgjör þeirrar sölu voru greiddar rúmar 620 þúsund krónur upp í söluþóknun, sem nam rúmum 960 þúsund krónum, en inneign L-94 ehf. nam þá þeirri fjárhæð og vantaði því upp á eftirstöðvar söluþóknunar 340 þúsund krónur.

Erna seldi síðan aðra eign fyrir L-94 ehf. við Trönuhraun í Hafnarfirði og tók þar á móti kaupsamningsgreiðslum og gerði upp vanskil vegna fasteignagjalda og fjárnámskröfu á hendur L-94 ehf. sem hvíldu á umræddri eign. Erna greiddi hluta eftirstöðva kaupverðs til L-94 ehf. en hélt eftir jafnvirði áður umgetinnar reikningsskuldar L-94 ehf. samkvæmt viðskiptamannayfirliti Fasteignakaupa ehf. eða rétt rúmar 340 þúsund krónur, þar sem sú fjárhæð var þá enn ógreidd vegna hinnar fyrri sölu. Andrés Pétur mótmælti þessu og sagði að henni væri óheimilt að halda eftir þessum greiðslum þar sem um vörslufé væri að ræða.

Erna segir það rangt að hún hafi ekki heimild til að halda eftir af umræddu vörslufé og bendir á reglugerð um fjárvörslureikninga fasteignasala máli sínu til stuðnings. Þar segir að ef fasteignasali eigi fé hjá viðskiptamanni sínum vegna gjaldfallinnar þóknunar eða útlagðs kostnaðar samkvæmt rétt bókfærðri stöðu viðskiptareiknings hans sé honum heimilt að taka þá greiðslu út af fjárvörslureikningi enda sé fullnægt skilyrðum til skuldajöfnuðar.

Þá segir Erna það rangt að sala eignarinnar við Austurmörk hafi ekki gengið í gegn. Um eignina hafi verið þinglýst kaupsamningi eins og venja sé og fari um efndir hans samkvæmt samningsskilmálum milli samningsaðila. Kaupandi eignarinnar hafi hins vegar ekki greitt samkvæmt ákvæðum kaupsamningsins og eigi L-94 ehf. eftir að fá hluta kaupverðsins greiddan. Erna segist ekki bera ábyrgð á efndum samningsins og sé það aðila samningsins að ganga eftir efndum, með aðstoð lögmanna, ef nauðsyn krefur. Á meðan vanefndir séu til staðar verði samningsferlinu hins vegar ekki lokið með afsali og endanlegu uppgjöri eins og lög gera ráð fyrir.

Samkvæmt upplýsingum blaðamanns frá Frjálsa fjárfestingabankanum hefur ekki enn farið fram nafnabreyting á lánum venga umrædds iðnaðarhúsnæðis við Austurmörk og því virðist það liggja ljóst fyrir að Erna og fasteignasala hennar hafa ekki enn klárað söluna á eigninni.