Jón Steinar segist engar siðareglur hafa brotið

Jón Steinar Gunnlaugsson, hæstaréttardómari, segir af og frá að hann hafi brotið siðareglur Lögmannafélags Íslands. Jón Steinar vann lögmannsstörf fyrir Ingibjörgu Pálmadóttur, sambýliskonu Jóns Ásgeirs Jóhannessonar, og tók svo að sér málarekstur fyrir Jón Gerald Sullenberger gegn Baugi.

Fyrir Héraðsdómi á mánudag sagði Ingibjörg að Jón Steinar, sem áður var lögmaður hennar, hefði sagt sér að ástæða þess að hann hefði tekið að sér að reka mál Jóns Geralda Sullenberger gegn Baugi hafi verið sökum mikils þrýsting frá svo mörgum mönnum. Í yfirlýsingu frá Jóni Steinari segir hann Ingibjörgu segja ósatt. Hann hafi ekki orðið fyrir nokkrum þrýstingi.

Barst fjölmiðlum þá yfirlýsing frá Ingibjörgu, þar sem hún ítrekar orð sín í réttarsal og segir að sér hafi sárnað að lögmaður sinn, Jón Steinar, sem gegndi trúnaðarstarfi fyrir hana og hún taldi sig geta treyst, skyldi á sama tíma afhenda lögreglu gögn og borið fram kæru Jóns Geralds á hendur Jóni Ásgeiri.

Í siðareglum lögmanna segir að Lögmaður megi ekki fara með hagsmuni tveggja eða fleiri skjólstæðinga í sama máli, þegar hagsmunir þeirra eru andstæðir eða veruleg hætta er á slíku. Að lögmaður skuli jafnframt varast að taka að sér nýjan skjólstæðing, ef hagsmunir hans og þeirra skjólstæðinga lögmannsins, sem fyrir eru, fái ekki samrýmst eða hætta geti verið á slíku.

Jón Steinar segir af og frá að hann hafi brotið siðareglur þegar hann tók að sér málarekstur fyrir Jón Gerald. Ingibjörg hafi leitað til sín með ákveðin verkefni sem hann hefði að langmestu leiti lokið þegar þetta var. Ekki hafi veriðum að ræða föst viðskipti þeirra á milli. Þá segist Jón Steinar ekki sjá hvaða tengsl Ingibjörg hafi við Baug sem gætu valdið árekstrum

Ingibjörg segir í yfirlýsingu sinni að síðustu skilaboð Jóns Steinars til hennar hafa komið frá systur hennar Lilju, sem bar henni þau orð Jóns Steinars að þennan raft, Jón Ásgeir, skyldi hún losa mig við sem fyrst.

Við það segist Jón Steinar ekki kannast.