Ódýrara að fá erlenda hjúkrunarfræðinga á Landspítalann

Landspítalinn hefur sagt upp samningum við tvö íslensk þjónustufyrirtæki sem hafa séð spítalanum fyrir hjúkrunarfræðingum og ætlar að ráða hjúkrunarfræðinga erlendis frá. Hátt í níutíu hjúkrunarfræðinga vantar á spítalann og segir hjúkrunarforstjóri ódýrara að ráða erlent starfsfólk.

Tvö þjónustufyrirtæki á sviði heilsuverndar Inpro og Alhjúkrun hafa útvegað Landspítalanum hjúkrunarfræðinga undanfarin ár. Fjöldi þeirra hefur starfað hjá þessum fyrirtækjum á hærri launum en landspítalinn hefur greitt. Inpro hefur mannað 12 stöðugildi á landspítalanum sem um þrjátíu hjúkrunarfræðingar hafa verið að sinna á ári. Alhjúkrun hefur mannað svipaðan fjölda stöðugilda með 17 hjúkrunarfræðingum.

Samningum við þessi tvö fyrirtæki var sagt upp í lok júlí og lýkur störfum þeirra um áramót. Anna Stefánsdóttir hjúkrunarforstjóri Landspítalans segir fyrirtækin ekki geta mætt nema litlum hluta af þörfum spítalans vegna manneklu. Hagstæðara sé að hafa fastráðið starfsfólk.

Hátt í 90 hjúkrunarfræðinga vantar á spítalann. Anna segir að meðal annars verði brugðist við því með því að auglýsa eftir erlendum hjúkrunarfræðingum til starfa.