Stokkað upp í skipuriti Icelandair Group

Miklar skipulagsbreytingar eru framundan hjá Icelandair Group, en fyrirtækið hefur nánast tvöfaldast að vexti á undanförnum árum.

Hinn 15. ágúst síðast liðinn sendi stjórn Icelandair Group Kauphöllinni sex mánaða uppgjör sitt og þar kom fram að til stæði að breyta töluvert uppbyggingu fyrirtækisins. Jón Karl Ólafsson forstjóri Icelandair Group og Icelandair flugfélagsins segir að velta fyrirtækisins á þessu ári verði um 70 - 80 milljarðar en þegar eldra skipulag var gert var velta fyrirtækisins um 40 milljarðar. Icelandair Group hefur t.d. nýlega keypt flugfélög í bæði Lettlandi og Tékklandi, en það tékkneska er að svipaðri stærð og Icelandair.

Við ætlum okkur stærri hluti á nýjum mörkuðum. Þannig að við erum að skerpa á því að fyrirtækið er vaxandi og mun halda áfram að vaxa á næstu árum," segir Jón Karl.

Icelandair Group verður skipt upp í fjögur afkomusvið, um áætlunarflug, leiguflug, fraktsvið og svo svið sem er ótengt flugrekstri en undir það fellur t.d. hótelreksturinn. Yfir þessi svið verða settir framkvæmdastjórar sem heyra undir forstjóra Icelandair Group en það verður enginn með forstjóratitil hjá Icelandair flugfélaginu. Í skipuritinu sem sent var Kauphöllinni voru engin nöfn fyrir æðstu stjórnendur.

Jón Karl segir að menn innan fyrirtækisins séu að sinna þessum störfum í dag, rétt eins og hann sjálfur. Í upplýsingum sem sendar voru Kauphöllinni hafi útlínurnar verið dregnar. Verið sé að vinna í því að finna fólk í framkvæmdastjórastöðurnar og sjálfur hafi hann ekki heyrt neitt annað en hann sjálfur verði áfram forstjóri Icelandair Group.