Kærðir fyrir að hylja ekki malarfarm sinn

Nokkrir ökumenn á malarflutningabílum í umdæmi lögreglunnar á Selfossi hafa verið kærðir í dag í átaki lögreglunnar gegn akstri án yfirbreiðsla.

Tilkynningum rigndi í morgun yfir lögregluna frá óánægðum ökumönnum sem kvörtuðu undan því að sandur fyki á bíla þeirra af malarflutningabílum sem ekki væru með ábreiður yfir farminum eins og lög gera ráð fyrir. Mikið hvassviðri á Suðurlandi mun hafa valdið því að mun meira fauk af bílunum en venjulega.

Lögregla fór því í malarnámurnar í umdæminu, sem eru nokkrar, og beindi því til ökumanna að setja ábreiður á farm sinn, ellegar yrðu þeir kærðir. Ekki sinntu þó allir tilmælum lögreglunnar og nú í eftirmiðdaginn hafði hún í samvinnu við lögregluna á höfuðborgarsvæðinu stoppað nokkra malarflutningabíla og kært ökumenn þeirra fyrir lögbrot.