Hvetja utanríkisráðherra til að taka af skarið í loftlagsmálum

Náttúruverndarsamtök Íslands vonast til þess að Ingibjörg Sólrún Gísladóttir utanríkisráðherra kynni metnaðarfulla í loftlagsmálum fyrir hönd Íslands á fundi Sameinuðu þjóðanna í New York í dag.

Það er Ban-ki Moon, framkvæmdastjóri Sameinuðu þjóðanna, sem hefur boðað til fundarins en markmið hans er að þrýsta á um að aðildarríki samtakanna að ná árangri á næsta fundi Loftslagssamningsins á Balí í Indónesíu í desember. Þar á að ná samkomulagi um næstu skref í umhverfismálum eftir að núverandi skuldbindingatímabil Kyoto-bókunarinnar rennur út árið 2012.

Í bréfi Náttúruverndarsamtaka Íslands til utanríkisráðherra segir að útstreymi gróðurhúsalofttegunda verði að minnka um 50 prósent fyrir 2050. Um það verði að nást bindandi samkomulag á vettvangi Sameinuðu þjóðanna.

Náttúruverndarsamtökin vísa enn fremur í ræðu Ingibjargar Sólrúnar á flokkstjórnarfundi Samfylkingarinnar á laugardag þar sem hún sagði að loftslagsmálin yrðu efst á baugi á næstu árum og ljóst að krafa yrði gerð á hendur Íslendingum um að minnka losun gróðurhúsalofttegunda. Náttúrurverndarsamtökin taka undir þetta og benda á að Ísland verði að sýna fordæmi með því að stöðva aukningu í losun gróðurhúsalofttegunda hér á landi og síðan draga úr og setja skýr mörk um 30 prósenta samdrátt fyrir árið 2020 miðað við 1990.

Skora náttúruverndarsamtökin á utanríkisráðherra að í ávarpi sínu í New York leggi hún áherslu á nauðsyn þess að Sameinuðu þjóðirnar veiti skýrt umboð til samninga á Balí.