Faxaflóahafnir hafa áhuga á eignum NATO í Hvalfirði

Uppboð á fyrrum eigum NATO í Hvalfirði kom til umræðu á stjórnarfundi Faxaflóahafna í dag. Gísli Gíslason hafnarstjóri fór yfir stöðu málsins. Í framhaldi af því samþykkti hafnarstjórn að fela hafnarstjóra að taka upp viðræður við sveitarstjórn Hvalfjarðarsveitar um gerð tilboðs í eignirnar.

Andvirðið af sölu NATO-eignanna í Hvalfirði mun renna beint í ríkissjóð en ekki til Mannvirkjasjóðs NATO eins og algengast er við sölu á eignum af þessu tagi. Samkvæmt upplýsingum frá Varnarmálaskrifstofu utanríkisráðuneytisins afskrifaði NATO stöðina að fullu fyrir áratug síðan og því er ekkert "hrakvirði" til staðar á henni.

Undir eðlilegum kringumstæðum eru samningar um yfirtöku stjórnvalda á NATO-eignum þannig að ef stjórnvöld endurselja eignirnar til þriðja aðila ber þeim að greiða andvirðið til Mannvirkjasjóðs NATO, það er eignamatið eins og það var, eða hrakvirðið, þegar eignirnar komust í hendur viðkomandi stjórnvalda.

Fyrrum eigur NATO í Hvalfirði verða boðnar upp og var uppboðið auglýst nú um helgina. Fyrir utan olíutankana og bryggjuna á hinu tæplega 19 hektara svæði eru þar ýmsar byggingar í mismunandi ástandi, allt frá því að vera ónýtar og upp í að vera taldar í mjög góðu standi.

Meðal húseigna má nefna eina þrjá svefnskála, vélahús, mötuneyti, skrifstofur og ýmsan dælubúnað í tengslum við olíutankana. Guðjón Hafliðason umsjónarmaður eignanna segir að reytingur af fólki hafi lagt leið sína í Hvalfjörðin til að skoða það sem er til sölu.