Leit að Nylon stúlku slegin af

Ekkert verður af fyrirhuguðum sjónvarpsþætti Nylon flokksins á Stöð 2 Sirkuss í haust eins og efni stóðu til. Búið var að gera samkomulag um raunveruleikaþætti sem áttu að fjalla um fyrirhugaðar áheyrnarprufur hjá Nylon og upptökur erlendis í kjölfarið. Ástæða þess að hætt er við þættina er sú að stúlkurnar vilja ekki bæta meðlimi við flokkinn eftir vel heppnaða framkomu á Kaupþingstónleikunum á föstudaginn síðastliðinn. Í kjölfarið var ákveðið að Nylon yrði í framtíðinni tríó en ekki kvartett.

"Einar Bárðason, umboðsmaður Nylon, hafði samband við mig fyrir helgi og sagði mér að þessi staða gæti komið upp, sagði Pálmi Guðmundsson sjónvarpsstjóri Stöðvar 2 í samtali við Vísi." "Einar sagði stelpunum líka vel að vera bara þrjár. Hann vildi prófa þríeykið á Kaupþingstóleikunum. Hann hringdi svo aftur í mig á mánudaginn og sagði mér að stelpurnar væru ánægðar með þetta fyrirkomulag og vildu ekki fara af stað með áheyrnarprufurnar," sagði Pálmi.

"Í ljósi þess að áheyrnarprufurnar verða ekki er botninn dottinn úr þessu og verður hætt við þættina enda áttu áheyrnarprufurnar að vera þungamiðja þeirra. Einar skildi það vel og er ákvörðunin tekin í sátt," sagði Pálmi

Ferlið við gerð þáttanna var komið vel af stað og staðfesti Pálmi að rammasamkomulag hefði náðst fyrir tveimur vikum um framleiðslu þáttanna. Auk þess var vinnsla að einhverju leyti hafin. Til marks um það þá fylgdi upptökuhópur frá SagaFilm stelpunum eftir á Laugardalsvelli á föstudag enda stóð til að þáttaröðin hæfist á Kaupþingstónleikunum en þeir eru stærstu tónleikar sem Nylon hefur komið fram á til þessa.

Aðspurður sagði Pálmi málið ekki koma sér illa fyrir Stöð 2. "Við þurfum ekki að kaupa nýtt efni sérstaklega þrátt fyrir að hætt sé við þættina, enda mjög vel byrg af bæði innlendu og erlendu efni," sagði Pálmi.