Í öndunarvél á gjörgæslu eftir bílslys við Vík

Líðan mannsins sem fluttur var með þyrlu Landhelgisgæslunnar á Slysadeild í Fossvogi eftir að bifreið hans hafnaði í lóni skammt frá Vík er stöðug. Maðurinn er í öndunarvél á gjörgæslu samkvæmt upplýsingum vakthafandi læknis á Landsspítalanum.

Bifreið mannsins sem er tæplega áttræður hafnaði í lóni skammt frá Vík á tíunda tímanum í morgun. Samkvæmt upplýsingum lögreglunnar á Hvolsvelli virtist maðurinn missa stjórn á bílnum og fara út af þjóðveginum í lónið sem kemur úr Kerlingardalsá austan við Vík.

Tilkynning barst lögreglunni á Hvolsvelli klukkan hálf tíu í morgun þegar vegfarandi kom að.

Björgunarsveitin á Vík kom á vettvang með bát og þurrgalla. Ekki var staðfest að nokkur væri í bílnum fyrr en báturinn kom að. Bíllinn var í halla á botni lónsins og vatn náði upp á miðjar rúður. Maðurinn var með meðvitund og var líðan hans stöðug, en hann var búinn að bíða í um klukkustund. Björgunarsveitarmenn þurftu að brjóta rúðu til að ná manninum út og hann var orðinn mjög kaldur þegar það tókst. Maðurinn var fluttur með sjúkrabifreið til Hvolsvallar þaðan sem hann var fluttur með þyrlunni.

Maðurinn mun hafa verið á leið til Reykjavíkur þegar slysið átti sér stað.