Mun leggja sérstaka áherslu á rauða bíla

Þjóðfélagsrýnirinn Andrés Jónsson sem síðast stofnaði Eyjuna.is í félagi við Pétur Gunnarsson hefur verið ráðinn sem kynningarstjóri hjá B&L. Andrés hefur mikið starfað fyrir Samfylkinguna í gegnum árin og meðal annars verið formaður ungra jafnaðarmanna og kosningastjóri Ágústs Ólafs Ágústssonar, varaformanns Samfylkingarinnar.

Þrátt fyrir að hafa söðlað um segist Andrés alltaf koma til með að vera pólitískur og segist hann ætla að leggja ríka áherslu á að selja rauða bíla. Sjálfur er Andrés enginn sérstakur bílaáhugamaður en segir þó að innra með flestum leynist einhver bíladella.

Aðspurður segist Andrés hafa dregið sig út úr Eyjunni.is í miklu bróðerni og mun hann halda eitthvað áfram að blogga undir hennar nafni.