Drogba: Ég gæti misst af Afríkukeppninni

Framherjinn öflugi Didier Drogba hjá Chelsea viðurkennir að svo gæti farið að hann missti af Afríkukeppninni á næsta ári eftir hnéaðgerðina á dögunum.

Vonir stóðu til að Drogba næði jafnvel að spila einn leik með Chelsea áður en hann færi í Afríkukeppnina sem hefst í Gana þann 20. janúar, en í samtali við Sun viðurkenndi kappinn að ef til vill hefðu meiðslin verið alvarlegri en talið var í fyrstu.

"Ég hef ekki hugmynd um hvenær ég get spilað aftur, því enginn leikmaður færi í svona aðgerð ef meiðsli hans væru ekki alvarleg. Ég get ekki sagt hvenær ég sný aftur, en það kemur vel til greina að ég missi af Afríkukeppninni," sagði Fílstrendingurinn.