Nýr formaður LSS

Vernharð Guðnason, formaður Landssambands slökkviliðs- og sjúkraflutningamanna (LSS), lét af embætti formanns á stjórnarfundi sem haldinn var fyrir helgi.

Vernharð tekur við starfi slökkviliðsstjóra hjá Brunavörnum Skagafjarðar frá og með næstu áramótum. Sverrir Björn Björnsson tók við embætti formanns Landssambandsins en hann hefur verið varaformaður sambandsins síðastliðin þrjú ár.

Þá réð Landssambandið Valdimar Leó Friðriksson í starf framkvæmdastjóra fyrir skömmu. Valdimar er fyrrverandi alþingismaður. Hann hefur mikla reynslu af stjórnun félagasamtaka og störfum að verkalýðsmálum á vettvangi SFR.