Helmingur innlána bankanna frá útlendingum

Innlán íslensku bankanna hafa þrefaldast á tæplega tveimur árum en rúmlega helmingur þeirra kemur frá útlendingum.

Vorið 2006 voru íslensku bankarnir gagnrýndir fyrir að fjármagna sig að litlu leyti með innlánum en hlutfall innlána af útlánum var þá lágt sambanborið við sambærilega banka annars staðar. Í tölum sem Fjármálaeftirlitið tók nýlega saman sést að bankarnir hafa stóraukið innlán sín undanfarin misseri og hafa innlánin þrefaldast á undanförnum tveimur árum og kemur helmingur þeirra frá erlendum aðilum. Þannig hefur hlutfall innlána sem koma frá erlendum aðilum vaxið úr um 7% í lok árs 2005 í um 51% í ágúst 2007.

Það sem hefur hvað mest þar um að segja er að viðskiptabankarnir hafa lagt aukna áherslu á söfnun innlána í starfsstöðum sínum erlendis og náð til sín viðskiptavinum þar með því að bjóða hagstæða vexti.

Guðmundur Jónsson, sviðstjóri hjá Fjármálaeftirlitinu, telur að með auknum innlánum sé fjármögnun bankanna orðin fjölbreyttari en áður og bankarnir óháðari látöku á alþjóðlegum fjármálamörkuðum.