Hitaveita tekin í notkun í Grýtubakkahreppi

Tímamót urðu í Grýtubakkahreppi þegar ný hitaveita var formlega tekin í notkun. Sveitarstjóri Grýtubakkahrepps segir þetta ævintýri líkast. Heita vatnið kemur frá borholu á Reykjum í Fnjóskadal og ferðast um langan veg eða allt að 50 kílómetra.

Það var því mikið um dýrðir þegar Franz Árnason forstjóri Norðurorku og fleiri fögnuðu formlegri opnun hitaveitunnar á Grenivík en Norðurorka á borholuna sem vatnið streymir úr.

Fnjóskdælir njóta einnig góðs af þessu heita vatni en alls kostar hitaveitan um hálfan milljarð króna.

Hitaveitan mun auka lífsgæði íbúanna verulega að mati sveitarstjórans en alls fá nú um 100 heimili heitt vatn og mun þeim fjölga síðar.

Íbúarnir hafa nú einnig fengið aðgang að ljósleiðara, sem er í raun önnur bylting, segir sveitarstjórinn. Grenvíkingar hafa þurft að bíða lengi eftir almennilegu netsambandi.