Franskur vísindamaður fannst eftir leit á hálendinu

Víðtæk leit var gerð í gærkvöldi af frönskum vísindamanni sem fór í ferðalag um hálendið á fimmtudag til að safna GPS landmælingartækjum raunvísindastofnunar Háskóla Íslands. Maðurinn fannst heill á húfi klukkan hálf tvö í nótt í bíl sínum, sem hafði festst í vatni og krapa á miðri Fjallabaksleið.

Tilkynning barst um að mannsins væri saknað í eftirmiðdaginn í gær. Björgunarsveitir frá Hellu, Hvolsvelli, Vík og Kirkjubæjarklaustri, auk minni björgunarsveita af svæðinu leituðu að manninum frá Kirkjubæjarklaustri norður undir Þórisvatn og austur að Kálfafelli. Kolvitlaust veður var á svæðinu aðfaranótt föstudags að sögn Atla Árdal Ólafssonar varðstjóra lögrelgunnar á Hvolsvelli sem stjórnaði aðgerðum.

Maðurinn var að sækja átta GPS senda sem staðsettir voru víðsvegar um svæðið. Björgunarsveitir fundu manninn nokkrum metrum áður en komið var að síðasta tækinu.

Hann hafði lagt af stað frá Reykjavík rétt fyrir hádegi á fimmtudag og talaði þá í GSM síma við eiginkonu sína. Síðan notaði hann ekki símann og svaraði ekki SMS skilaboðum sem konan sendi honum seinna. Leit reyndist erfið þar sem maðurinn hafði ekki notað kreditkort eða gist á farfuglaheimilum eða hótelum. Ein vísbending hafi þó komið frá bónda sem sagðist hafa séð bíl sem svipaði til bíl mannsins. Þegar maðurinn fannst var bíllinn orðinn olíu- og rafmagnslaus auk þess sem maðurinn var matarlaus og kaldur.

Atli segir manninn hafa farið af stað án ferðaáætlunar og ekki virst hafa hugmynd um hvað hann var að fara út í.

„Þetta er algjörlega glórulaust að fara svona af stað án ferðaáætlunar og án þess að gera sér grein fyrir aðstæðum."