Réðust grímuklæddir og vopnaðir inn í verslun

Fimm til sex piltar sem réðust vopnaðir inn í verslun Dominons í Spönginni í Grafarvogi á ellefta tímanum í gærkvöldi eru enn ófundnir. Lögreglan hafði mikinn viðbúnað í hverfinu eftir að tilkynning barst um ránstilraun piltanna og stöðvuðu alla bíla á leið út úr Grafarvoginum.

Nokkrir viðskiptavinir voru inni í versluninni þegar piltarnir réðust þar inn, grímuklæddir og vopnaðir, og héldu margir þeirra fyrst að um grín væri að ræða. Piltarnir voru bæði með hnífa og einhvers konar byssu en talið er líklegt að byssan hafi verið loft- eða dótabyssa. Koma tókst í veg fyrir að piltarnir hefðu með sér einhvern pening á brott en þeir slógu til starfsmanns verslunarinnar sem varð þó ekki meint af.

Aðeins er vika síðan að piltar á svipuðum aldri réðust vopnaðir inn í verslun í Hlíðunum og rændu þar peningum og tóbaki.