Íbúðaverð mun áfram hækka á næstu árum

Íbúðaverð mun halda áfram að hækka á næstu árum þótt hægja muni verulega á hækkunarhraðanum. Framboð á fasteignamarkaði virðist hafa náð hámarki og mun heldur minnka á næstu árum, en háir vextir, erfiðara aðgengi að lánsfé og kólnandi vinnumarkaður munu draga úr eftirspurn á markaði næstu mánuði og ár.

Gert er ráð fyrir viðsnúningi markaðar á árinu 2009 samhliða því sem vextir taka að lækka og ný uppsveifla tekur við í hagkerfinu, samkvæmt skýrslu Greiningadeildar Kaupþings, sem ber yfirskriftina Fasteignamarkaður á krossgötum.

Þorvaldur Gissurarson, forstjóri ÞG verktaka, hafði ekki kynnt sér skýrslu Greiningadeildarinnar þegar Vísir hafði samband við hann nú undir kvöld. En hann segir að menn hafi orðið varir við minni eftirspurn á markaðnum undanfarna tvo mánuði. „En það er útilokað að spá fyrir um framtíðina. Það eru væringar á lánamarkaði og óvíst með vexti. Þessi atriði hafa mikil áhrif á eftirspurn," segir Þorvaldur.

Þorvaldur telur enga kreppu vera í vændum á fasteignamarkaði. „Ég á von á að það verði ákveðin leiðrétting á markaðnum. Það er búið að vera langvarandi umframeftirspurn eftir íbúðahúsnæði og reyndar skrifstofuhúsnæði líka. En ég á von á að þarna verði breyting og meira jafnvægi komist á," segir Þorvaldur.