Davíð kallaði framsóknarmenn veimiltítur

Ný útgáfa að fjölmiðlafrumvarpi ríkisstjórnar Davíðs Oddssonar dagaði uppi eftir leynifund Guðna Ágústssonar þáverandi varaformanns Framsóknarflokksins með forseta Íslands, þar sem fram kom að forsetinn myndi óhikað og afdráttarlaust hafna frumvarpinu. Þetta kemur fram í nýrri ævisögu Guðna.

Guðni af lífi og sál heitir bókin sem kemur út í dag og er skrifuð af Sigmundi Erni Rúnarssyni. Þar er meðal annars ítarlega sagt frá því sem gerðist bakvið tjöldin í fjölmiðlamálinu sem skók þjóðina sumarið 2004 - einu mesta hitamáli síðari tíma í íslenskri pólitík. Frumvarpið kom flatt upp á ráðherra Framsóknar þegar Davíð Oddsson dró það fram á ríkisstjórnarfundi í apríl. Halldór verður svipþungur mjög og efast síðan um að frumvarpið standist stjórnarskrá, þá segist Guðna svo frá: "Davíð svarar honum strax og segir sessunaut sínum að laga þá bara frumvarpið sjálfur" og hendir síðan eintaki sínu af frumvarpinu í fang Halldórs.

Eftirleikurinn er þekktur, þegar Ólafur Ragnar Grímsson, forseti Íslands, sendir frúna eina til að vera viðstödd brúðkaup í Danaveldi, kemur heim og synjar fjölmiðlalögunum staðfestingu í beinni útsendingu 2. júní 2004. Stjórnmálaheimurinn leikur á reiðiskjálfi á eftir, ríkisstjórnin dregur frumvarpið til baka, í stað þess vísa því til þjóðaratkvæðagreiðslu, en síðan er hafin vinna við að breyta frumvarpinu og í bókinni er ljóstrað upp um afdrif þess. Guðni og forsetinn eru gamlir félagar úr Möðruvallarhreyfingunni og því er Guðni sendur suður á Bessastaði til að kanna hug Ólafs: "Svarið er afdráttarlaust. Forsetinn gefur Guðna fastlega til kynna að hann muni hafna nýju lögunum." Ráðherrar Framsóknar ákveða þá að leggja frumvarpsdrögin til hliðar - og segja má að forsetinn hafi þar með hafnað lögunum tvisvar.

Guðni tilkynnir Davíð Oddssyni afstöðu Framsóknarmanna, sem samkvæmt bókinni, "bregst reiður við", kallar framsóknarmenn "veimiltítur" og að Framsókn "sé að míga í sig af hræðslu". Daginn eftir er Davíð lagður inn á sjúkrahús og glímir næstu mánuði við erfið veikindi. Fjölmiðlamálið dagar uppi.