Ekki stjórnarfundur hjá OR fyrr en í næstu viku

Bryndís Hlöðversdóttir, stjórnarformaður Orkuveitu Reykjavíkur, segir að ekki verði boðað til stjórnarfundar í Orkuveitunni fyrr en í næstu viku til þess að ræða málefni REI. Þetta sagði Bryndís í samtali við fréttamann Stöðvar 2.

Til stóð að halda eigendafund hjá Orkuveitunni í dag en því var frestað í gær og þær skýringar gefnar að enn væri verið að vinna í málefnum REI og því ekki tilefni til að kallað saman eigendur.

Fulltrúar sjálfstæðismanna í stjórn Orkuveitunnar sendu hins vegar bréf til Bryndísar í dag og fóru fram á það stjórnarfundur yrði boðaður hið fyrsta til þess að ræða stöðu mála hjá REI í ljósi þeirra hugmynda sem birst hefðu í fjölmiðlum en hefðu ekki verið ræddar í stjórninni.