Stal nýjum gallabuxum en skildi gamlar eftir

Lögreglan á höfuborgarsvæðinu hafði afskipti af tveimur bíræfnum 14 ára stúlkum sem rænt höfðu gallabuxum og snyrtivörum í Smáralind.

Eftir því sem fram kemur í frétt lögreglunnar fór önnur stúlkan inn í verslun og fékk að máta tvennar gallabuxur. Hún skildi svo tvennar buxur eftir í mátunarklefa og taldi starfsmaður að buxurnar hefðu ekki passað.

Við nánari eftirgrennslan kom í ljós að aðrar buxurnar voru nýjar en hinar gamlar og slitnar. Stúlkan hafði því stolið nýjum gallabuxum og skilið gamlar eftir. Hún var hins vegar gripin í nærliggjandi verslun og reyndust stolnu gallabuxurnar vera í poka sem hún hafði meðferðis. Í þeirri verslun hafði vinkona hennar stolið snyrtivörum. Stúlkurnar voru fluttar á lögreglustöð og þar var þeim og foreldrum þeirra gerð grein fyrir alvarleika málsins.