Sala á Íbúðalánasjóði hemur verðbólguvæntingar

Sala á Íbúðalánasjóði væri mikilvægt skref til að hemja verðbólguvæntingar og skapa skilyrði fyrir lækkun stýrivaxta, segja forstjóri Askar Capital og stjórnarformaður Milestone.

Þeir Tryggvi Þór Herbertsson, fyrrum forstöðumaður Hagfræðistofnunar Háskóla Íslands og nú forstjóri Askar, og Karl Wernersson, stjórnarformaður Milestone, skrifa grein í Morgunblaðið í dag undir fyrirsögninni Dagur vonar.

Þar segja þeir ranghugmynda hafa gætt í umræðu um efnahagsmál að undanförnu. Sá tónn hafi verið sleginn að peningamálastefna Seðlabankans sé til húðar gengin. Þá segja þeir að hún sé lífseig sú villandi söguskýring að viðskiptabankarnir einir hafi stuðlað að hækkun fasteignaverðs með húsnæðislánum á lágum vöxtum.

Kjarni málsins sé hins vegar hin afdrifaríka ákvörðun stjórnvalda að víkka veðheimildir Íbúðalánasjóðs. Að þeirra mati eru það fyrst og fremst ráðstafanir stjórnmálamanna sem leiddu til útlánaþenslu á íbúðalánamarkaði.

Þá segja þeir stjórnmálamenn verða að standast þá freistingu að styrkja Íbúðalánasjóð til að auðvelda almenningi að eignast húsnæði með niðurgreiddu fjármagni. Þeir komast loks að þeirri niðurstöðu að sala á Íbúðalánasjóði væri mikilvægt skref til að hemja verðbólguvæntingar. Engin önnur efnahagsaðgerð væri þjóðinni til meiri heilla nú um stundir.