Mikilvægt að leiða mál REI til lykta sem fyrst

„Þetta er niðurstaðan og ég held að það felist í orðanna hljóðan að í samkomulagi geti báðir aðilar unað við sitt,“ segir Bjarni Ármannsson, stjórnarformaður Reykjavik Energy Invest, um það samkomulag sem Orkuveita Reykjavíkur hefur gert við hann og Jón Diðrik Jónsson.

Í samkomulaginu felst að Orkuveitan kaupi aftur það hlutafé sem Bjarni og Jón Diðrik lögðu inn í REI þegar þeir komu að félaginu í september. Bjarni segir að ekki hafi orðið að því sem lagt var af stað með og því sé eðlilegt að leiðir skilji. „Ég hagnast ekki á þessu og hef ekki áhuga á því," segir Bjarni um samkomulagið.

Aðspurður segir Bjarni að mikilvægt sé að leiða til lykta mál REI sem allra fyrst, bæði vegna félagsins sjálfs og viðsemjenda þess.

Spurður hvort hann hyggist fjárfesta annars staðar í orkugeiranum segir Bjarni að hann hafi engar ákvarðanir tekið um það. „Þetta er hins vegar mjög áhugaverður geiri og feikilega mörg tækifæri í honum. Það er hægt að nýta vel þá þekkingu sem er fyrir hendi hér á landi," segir Bjarni. Hins vegar hafi hnökrar í ákvarðanaferli eigenda Orkuveitunnar leitt til þeirrar niðurstöðu sem nú er komin. Tækifærin séu þó enn til staðar fyrir fyrirtækið.

Bjarni situr sem stjórnarformaður REI fram að áramótum. Aðspurður um verkefnin fram að því segir Bjarni að skilja verði við fyrirtækið á faglegan átt og skila þeirri þekkingu og tengingum sem skapast hafi til þeirra aðila sem taka við.