Dýr sopi: Þrjátíu daga fangelsi þrátt fyrir bakflæði

Karlmaður var í dag dæmdur í 30 daga fangelsi í Hæstarétti en hann var tekinn fyrir ölvun við akstur í morgunsárið í febrúar á síðasta ári. Maðurinn bar því við að hann þjáðist af vélindarbakflæði og hefði drukkið áfengi kvöldið áður.

Eftir að hafa verið stöðvaður í Reykjavík var maðurinn látinn blása í mæli og kom í ljós að 0,74 mg af vínanda í hverjum lítra af útöndurlofti. Hann var því kærður fyrir ölvunarakstur en vefengdi niðurstöðu mælingarinnar þar sem .... vínandamettað loft úr meltingarvegi haft áhrif á mælinguna þar sem hann hafi þjáðst af vélindabakflæði eins og segir í dómnum.

Maðurinn sýndi fram á læknisvottorð sem staðfesti þetta. En samkvæmt dómi er þetta ekki í fyrsta skipti sem maðurinn er sakaður um ölvunarakstur.

„Samkvæmt sakarvottorði ákærða 22. ágúst 2007 var ákærði sviptur ökurétti í 18 mánuði 2. mars 1998 vegna ölvunaraksturs. Hann var á ný 30. maí 2001 sviptur ökurétti í þrjú ár vegna ölvunaraksturs. Þá gerði hann tvær sáttir hjá lögreglustjóra 29. apríl 2002 vegna sviptingaraksturs. Honum var 11. nóvember 2002 gerð sekt vegna aksturs sviptur ökurétti. Hann var dæmdur 10. apríl 2003 í fangelsi í einn mánuð vegna sviptingaraksturs. Loks var hann dæmdur 21. júní 2004 í tveggja mánaða fangelsi skilorðsbundið í eitt ár fyrir fjársvik."

Hæstiréttur féllst ekki á bakflæðisrök mannsins og var hann því dæmdur í 30 daga fangelsi og sviptur ökurétti ævilangt. Einnig þarf hann að greiða 200.000 krónur í málsvarnarlaun og 138.440 krónur í annan sakarkostnað.