Hótaði öryggisverði með insúlínsprautu

Héraðsdómur Reykjavíkur hefur dæmt síbrotamann í hálfs árs fangelsi fyrir fjölmörg hegningar- og fíkniefnabrot.

Maðurinn var meðal annars ákærður fyrir að hafa stolið þvagsýnaglasi, eyrnapinnum og plokkara úr lyfjaverslun á Smáratorgi og fyrir að hafa hóta öryggisverði að stinga hann með insúlínsprautu þegar öryggisvörðurinn hafði afskipti af honum vegna þjófnaðarins.

Enn fremur var maðurinn ákærður fyri hylmingu en lögreglan fann meðal annars skjávarpa, GPS-staðsetningartæki og fartölvu við húsleit hjá manninum.

Maðurinn játaði brot sín skýlaust en hann hafði tíu sinnum áður verið dæmdur fyrir ýmis brot. Var tekið tillit til þess við ákvörðun refsingar. Frá sex mánaða dómnum dregst tæplega tveggja mánaða gæsluvarðhaldsvist.