Fimmtán mánaða fangelsi fyrir nauðgun

Héraðsdómur Suðurlands dæmdi í dag karlmann í fimmtán mánaða fangelsi fyrir nauðgun með því að hafa haft samræði þegar hún gat ekki spornað við verknaðinum sökum ölvunar. Þá var hann enn fremur dæmdur til að greiða henni 800 þúsund krónur í bætur vegna nauðgunarinnar.

Samkvæmt framburði konunnar hitti hún manninn á veitingastað þar sem þau voru að skemmta sér. Fljótlega varð hún veik og fór að æla. Sagði hún manninn hafa farið með sig heim, klætt sig úr og haft við sig samfarir án þess að hún hefði getað spyrnt á móti vegna ölvunar.

Maðurinn neitaði í fyrstu að hafa haft samfarir við konuna en breytti svo framburði sínum og viðurkenndi að hafa haft við hana samfarir. Dómnum þótti framburður konunnar staðfastur og trúverðugur en framburður ákærða ekki. Út frá framburði vitna taldi dómurinn sannað að þannig hefði verið ástatt fyrir konunni að hún hefði ekki getað spornað við verknaðinum sökum ölvunar. Var maðurinn því sakfelldur.