Samþykkt að leggjast gegn nektardansi í borginni

Fram kemur í umsögninni að sérfræðingar í kynferðisofbeldi hafi sýnt fram á að í skjóli nektardansstaða þrífist gjarnan vændi auk þess sem erfitt sé að ganga úr skugga um hvort þær stúlkur sem þar starfi séu til þess neyddar eða ekki. Vísað er í greinargerð rannsóknarstofu í kvenna- og kynjafræðum við HÍ venga þessa. Segir enn fremur að borgaryfirvöld hafi tekið þessar ábendingar alvarlega og vilji sporna gegn rekstri nektarstaða í borginni enda séu þar tvímælalaust almannahagsmunir í húfi. Borgarráð leggst hins vegar ekki gegn almennu rekstraleyfi fyrir veitingastaðina.

Samkvæmt nýjum lögum um veitingastaði og skemmtanahald þarf sértaka undanþágu til þess að heimila nektardans á veitingastöðum og þarf veitingastaðurinn jákvæða umsögn frá öllum umsagnaraðilum. Borgarráð samþykkti umsögn í lok ágúst þar sem ekki var lagst gegn því að umrædd veitingahús fengju rekstrarleyfi enda væri staðsetning þeirra og afgreiðslutími innan marka reglna borgarinnar. Í umsögnunum var þó vísað til nýlegrar umsagnar lögreglustjóra höfuðborgarsvæðisins um veitingastaðinn Goldfinger í Kópavogi og því beint til hans að hafna einnig heimild til að sýna nektardans í atvinnuskyni á umræddum veitingastöðum.

Hins vegar þótti lögreglustjóra höfuðborgarsvæðisins umsögnin ekki nógu skýr. Önnur umsögn var því tekin fyrir á fundi borgarráðs 25. október. Þar var lagst gegn leyfi til staðanna til nektardans. Afgreiðslu tillögunnar var hins vegar frestað vegna andmælaréttar eigenda veitingastaðanna. Eftir að hafa farið yfir andmælin samþykkti borgarráð í dag að heimila ekki nektardans á stöðunum þremur.