Eðlilegt að fá undanþágu á mengunarkvóta flugvéla

Samgönguráðherra telur eðlilegt að Íslendingar reyni að fá undanþágu frá reglugerð Evrópusambandsins um mengunarkvóta á flugvélar. Að öðrum kosti gætu íslensk flugfélög neyðst til að draga verulega úr flugumferð.

Evrópusambandið vinnur nú að reglurgerð sem á setja mengunarkvóta á flugvélar. Markmiðið er að reyna draga úr mengun af völdum flugumferðar og ýta undir notkun lesta og annarra minni mengandi samgöngutækja.

Samkvæmt reglugerðinni verður flugfélögum úthlutaður kvóti sem miðast við 90 prósent af heildarútblæstri tiltekins flugfélags á árunum 2004 til 2006. Reglugerðin á að taka gildi árið 2011 og því ljóst að flugfélög þurfa að fækka flugum verulega ef þau eiga að vera innan kvótans.

Reglugerðin er sérstaklega óhentug Íslendingum þar sem hún tekur ekki tillit til þess hversu landið er háð flugsamgöngum.

Í samtali við fréttastofu Stöðvar 2 sagði Kristján L. Möller samgönguráðherra eðlilegt að Íslendingar sækist eftir undanþágu frá reglugerðinni með tilliti til sérstöðu landsins. Sagði hann það liggja í augum uppi að reglugerðin sé miðuð við aðstæður á meginlandi Evrópu og því geti Íslendingar ekki samþykkt hana óbreytta.