Fáir komast í gegnum greiðslumat bankanna

Sárafáir komast lengur í gegn um nálarauga greiðlumats bankanna vegna húsnæðislána eftir að þeir hertu skilyrði fyrir lánveitingum til muna. Er ástandinu líkt við að bankarnir séu nánast hættir að lána til íbúðakaupa.

Meðal hertra skilyrða er að nú þurfa umsækjendur að leggja fram mun meira eigin fé en áður og í vissum tilvikum hefur tekjuútreikningum líka verið breytt þannig að greiðlugeta hefur verið metin niður á við.

Í öllum bönkunum fást hins vegar þau svör að lánsumsóknir séu samningsatriði í hverju einu tilviki en í megin atriðum eru breytingarnar á fyrrnefndan veg.

Þá eru bankarnir nær alveg hættir að lána einstaklingum til hutabréfakaupa en ef farið er ár aftur í tímann var algengt að þeir lánuðu allt upp í 70 prósent á móti 30 prósenta framlagi einstaklingsins til kaupanna. Bankarnir tóku svo veð í bréfunum.

Upp á síðkastið hafa bréfin hins vegar rýrnað hratt og í þeim tilvikum, sem þau hafa farið niður fyrir veðgildið, krefja bankar nú lántakendurna um aukatryggingar en selja bréfin að öðrum kosti til að tryggja hagsmuni sína.