Bíða þess að komast inn á Breiðasund til veiða

Nokkur síldveiðiskip bíða þess nú að birti af degi til að geta haldið til veiða inni á Breiðasundi rétt við Stykkishólm eftir að Áskell EA fékk þar 600 tonn af góðri síld í tveimur köstum í gær.

Skipstjórinn á Áskeli fékk kunnugan mann á trillu til að leiðbeina sér á milli hættulegra skerja alveg upp undir land þar sem síldin veiddist. Þarna mun aldrei hafa verið veidd síld áður.

Að sögn stýrimanns á Áskeli nú í morgun hafði heldur dregið úr veiðinni í Grundarfirði og því var ákveðið að kanna sannleiksgildi sagna um að síld væri á Breiðasundi.