Blæs á ásakanir um vanþekkingu

Matsfyrirtækið Standard og Poors's segir Ísland það land sem það fylgist hvað mest með og blæs þannig á fullyrðingar íslenskra ráðamanna, sem gagnrýnt hafa nýtt mat fyrirtækisins sem birt var í gær.

Matsfyrirtækið Standard & Poors breytti í gær horfum á lánshæfismati ríkisjóðs í neikvæðar úr stöðugum. Forsætisráðherra gagnrýndi matið í fjölmiðlum í gær og sagði skorta að það væri byggt á nýjustu upplýsingunum sem til væru. Í Morgunblaðinu í dag gaf fjármálaráðherra það svo í skyn að ákveðinnar vanþekkingar gæti hjá fyrirtækinu á íslensku efnahagslífi. Standard & Poor's vísar allri slíkri gagnrýni á bug. Fyrirtækið segist þekkja aðstæður mjög vel hér á landi og Ísland sé eitt þeirra landa sem fyrirtækið heimsæki hvað oftast vegna þess hve örar breytingar hafa verið í efnahagslífinu.

Standard & Poor's tekur undir gagnrýni Seðlabankans í mati sínu og segir aðhald skorta í ríkisfjármálum. Forsætisráðherra svaraði þeirri gagnrýni í gær með því að benda á að tekjur ríkissjóðs hefðu aukist og tekjuafgangur ríkissjóðs á þessu ári verði meiri og betri en búist hafði verið við. Sérfræðingur hjá Standard og Poor's segir mikinn tekjuafgang aðeins segja hálfa söguna þar sem auðvelt sé að skila tekjuafgangi þegar þenslan er mikil.

Hér má sjá viðtalið í heild við sérfræðing Standard & Poor's

Ath. viðtalið er á ensku.