Segir Pólverjana boðaða á fundinn á fölskum forsendum

„Það voru engin læti af minni hálfu. Við vorum bara að árétta það að starfsmenn okkar væru ekki í stéttarfélaginu,“segir Benedikt Sveinsson framkvæmdastjóri Stál í stál en honum var hent út af fundi sem félag vélstjóra og málmtæknimanna hélt með pólskum starfsmönnum fyrirtækisins í gær. 12 Pólverjar vinna hjá Stál í stál en af þeim eru aðeins fjórir stálsmiðir.

Það má segja að það sé stál í stál á milli fyrirtækisins og VM. En fyrirtækið vill meina að 12 Pólverjar sem vinna hjá því séu ekki félagar í VM heldur í Fit, sem er félag Iðn- og tæknigreina.

„Það var ekki tekið í öxlina á mér en menn voru pirraðir og ég skyldi þetta ekki alveg. Við komum bara þarna inn til þess ná sambandi við okkar menn," segir Benedikt sem vildi ekki svara því hversvegna honum var hent útaf fundinum. „Ég hef ekki tíma í þetta," sagði Benedikt og skellti á blaðamann Vísis.

Hann vísaði hinsvegar á Arngrím Kristjánsson trúnaðarmann starfsmanna fyrirtækisins sem segir að mennirnir hafi verið boðaðir á fundinn á fölskum forsendum. „Þeir eru ekki í félaginu enda var tekin ákvörðun fyrir nokkru um að enginn af okkar starfsmönnum sé í VM, vegna þess að hér eru ekki bara stálsmiðir. Við erum á miklu breiðara sviði," segir Argrímur sem hefur engar skýringar á því hversvegna Pólverjarnir voru boðaðir á fundinn. Hann bendir einnig á að aðeins fjórir stálsmiðir vinni hjá fyrirtækinu, hinir séu húsasmiðir og eigi þarafleiðandi ekki að vera í VM.

„Mig grunar að þeir séu að reyna að ná þeim til sín. Þessir menn hafa aldrei verið í félaginu enda get ég ekki treyst þessum mönnum til þess að semja um laun fyrir mig enda geta þeir ekki talað við vinnuveitendur á málefnanlegum nótum."

Arngrímur heldur því fram að Pólverjarnir hafi ekki vitað hvaða stéttarfélag var að boða þá á fund en maður frá VM mætti á vinnustaðinn á mánudaginn. „Það kom maður hingað og við vísuðum honum út þar sem það starfar enginn félagsmaður þeirra hjá okkur. Hann var með hroka og ruddist hér inn þrátt fyrir beiðnir um að vera úti," segir Arngrímur en Örn Friðriksson hjá VM sagði á Vísi fyrr í dag að mennirnir hefðu verið félagsmenn VM fyrir skömmu.

Í pistli sem Örn skrifar á heimasíðu VM kemur fram að að tilurð þess að Benedikt og Arngrímur mættu á fundinn í gær megi rekja til þess að Vinnumálastofnun óskaði eftir því fyrir nokkru að VM kannaði tiltekin atriði í ráðningarsamningum pólskra starfsmanna fyrirtækisins. Í ljós kom að ákvæði þess samnings um yfirvinnuálag var ekki í samræmi við kjarasamning VM.

Arngrímur segir að þetta hafi verið leiðrétt. „Við erum með samninga sem endurskoðendur hafa farið yfir og Vinnumálastofnun hefur samþykkt. Þeir samningar voru gerðir við FIT en allir okkar samningar eru löglegir."

Arngrímur segir alla starfsmenn fyrirtækisins vera vini og vilji starfa saman. Málið sé á misskilningi byggt. Þeim hafi verið vísað á dyr af fundinum í gær með hroka og leiðindum.

„Við fengum aldrei tækifæri til þess að ræða við okkar menn en gerðum það eftir fundinn og bentum þeim á að þeir væru ekki í þessu félagi. Það er sjálfsagt að menn fari yfir sín réttindi og kanni sín mál, en það þarf að vera hjá réttu félagi."