Jarðhitasvæði ekki skemmd eftir skjálfta

Jarðhitasvæði Selfyssinga virðist ekkert hafa skemmst í skjálftahrinunni sem hófst á Selfossi í gærkvöldi. Jarðvísindamenn telja hana ekki vera forboða frekari jarðhræringa.

Jarðskjálfta hefur varð vart á Selfossi í alla nótt og mældist sá sterkasti um þrír á Richter um klukkan hálffimm í morgun. Við hann vöknuðu margir bæjarbúar. Sterkasti skjálftinn við upphaf hrinunnar mældist 3,5 á áttunda tímanum í gærkvöldi.

Upptökin eru rétt austan við Selfoss, í landi Laugadæla, og því urðu íbúar í bænum vel varir við skjálftana enda hafa lausamunir farið á ferð. Ekki er hins vegar vitað um tjón í heimahúsum né heldur á mannvirkjum.

Jarðvísindamenn, sem fylgjast grannt með framvindu mála, telja skjálftahrinuna ekki fyrirboða meiri háttar jarðhræringa á borð við þær, sem urðu á Suðurlandi árið 2000. Upptök þeirra skjálfta urðu á 3 til 4 kílómetra dýpi, en upptök skjálftanna núna eru að aðeins tveggja kílómetra dýpi. Meðal annars þess vegna hafa þeir fundist vel í bænum.