Segir margt gott í fjárhagsáætlun en undrast annað

Vilhjálmur Þ. Vilhjálmsson, oddviti sjálfstæðismanna í borgarstjórn Reykjavíkur segist ánægður með margt í fjárhagsáætlun meirihlutans sem kynnt var í dag. „Þessi fjárhagsáætlun var að miklu leyti undirbúin af okkur í gamla meirihlutanum undir minni stjórn þannig að eðlilega er margt í henni sem ég er sáttur við.," segir Vilhjálmur. Hann segist hins vegar vera ósáttur við nokkur atriði.

„Ég er ósáttur að ekki skuli haldið áfram að lækka fasteignaskatta eins og við höfðum hafið þegar við vorum í meirihluta," segir Vilhjálmur en tillaga þess efnis sem lögð var fram af sjálfstæðismönnum í borgarstjórn í dag var felld. „Þetta er sérstaklega slæmt í ljósi þess að fasteignamatið mun hækka næstunni sem gerir það að verkum að skattarnir munu hækka enn frekar. Í öðru lagi þá ber þessi áætlun með sér að ekki á að byggja mislægu gatnamótin á mótum Miklubrautar og Kringlumýrarbrautar."

Vilhjálmur bendið á að um gatnamótin 80 þúsund bílar á sólarhring auk þess sem kannanir hafi sýnt að öryggi myndi batna auk þess sem meirihluti borgarbúa sé á þeirri skoðun að þau eigi að byggja. „Við í minnihlutanum erum ósátt við þetta auk þess sem stefna meirihlutans í skipulags og íbúðamálum er yfir höfuð óskýr og loðin." Vilhjálmur bendir á að ekki komi fram í áætluninni hvort meirihlutinn hyggist standa við áætlanir fyrri meirihluta um aukið framboð á lóðum í borginni og þá sérstklega á lóðum undir sérbýli.

Framtíð Vatnsmýrarinnar og Reykjavíkurflugvallar er einnig óráðin að því er virðist, að sögn Vilhjálms. „Það er ekkert tekið á þeim málum í þessu plaggi, bara talað um að halda áfram undirbúningi að íbúðarbyggð á svæðinu. Ég minni á að helsta kosningaloforð F listans var að tryggja flugvöllinn í Vatnsmýrinni."

Að síðustu segir Vilhjálmur afskaplega sérstakt að meirihlutinn skuli ekki leggja fram málefnasamning og segir hann það vera vanvirðingu við borgarbúa. „Ágreiningsmálin á milli þessa fólks eru greinilega það stór að þau geta ekki lagt hann fram. Ég man nú ekki betur en að þau hafi gagnrýnt okkur á sínum tíma fyrir að leggja fram málefnasamning sem þau sögðu rýran í roðinu. Nú ætla þau hins vegar bara að sleppa því alfarið," segir Vilhjálmur og bætir því við að það sé í fyrsta sinn í sögu borgarinnar sem það gerist.