Vantrausti lýst á skólameistarann á Húsavík

Allir kennarar Framhaldsskólans á Húsavík nema einn hafa lýst yfir vantrausti á skólameistara skólans og saka hann um einelti og ólöglega brottvikningu.

Vantraustsyfirlýsingin var send í síðustu viku til menntamálaráðuneytisins. Undir hana rituðu allir kennarar nema einn en þar er skólameistari borinn þungum sökum. Kennarar saka meistara um einelti og valdníðslu og gera athugasemdir við ráðstöfun fjármuna. Þá er umdeild brottvikning eins kennara skólans nú orðin að dómsmáli en efasemdir munu um lögmæti hennar.

Samkvæmt upplýsingum fréttastofu ná erjurnar í skólanum aftur í tímann. Heimildarmaður fréttastofu segir að ástandið hafi aldrei verið verra en nú. Innan raða kennara hafi verið rætt um að þeir segi allir upp störfum.

Guðmundur Birkir Þorkelsson skólameistari á Húsavík vildi ekki tjá sig um málið þegar Stöð 2 leitaði viðbragða hans í dag. Hann sagði málið á innanhússtigi en staðfesti ágreining og að dómsmál væri nú rekið fyrir Héraðsdómi Norðurlands eystra vegna uppsagnar eins kennarans.

Málið er litið mjög alvarlegum augum á Húsavík og er hermt að skólinn sá nánast óstarfhæfur. Fundur fór fram í dag milli skólanefndar og hollvinasamstaka skólans.