Lítill munur á hlutfalli íslenskra og erlendra kynferðisbrotamanna

Sáralítill munur er á hlutfalli íslenskra og erlendra karlmanna sem fremja kynferðisglæpi hér á landi. Um 0,14 prósent íslenskra karlmanna fremja slíka glæpi og um 0,2 prósent erlendra karlmanna. Þá er ekki tekið tillit til þess að hingað koma fleiri þúsund erlendra ferðamanna ár hvert.

Ríkislögreglustjóri birti skýrslu sína um afbrotatölfræði fyrir helgi. Þar er meðal annars fjallað um kynferðisbrot hér á landi með tilliti til ríkisfangs og kemur þar í ljós að frá árinu 2005 hefur kynferðisbrotamönnum sem bera erlent ríkisfang fjölgað. Það kallar á þá spurningu hvort þessi fjölgun sé í réttu hlutfalli við fjölgun útlendinga hér á landi.

Þegar rýnt er í tölur Ríkislögreglustjóra og þær bornar saman við fjölda karlmanna sem búa hér á landi kemur í ljós að um 0,14 prósent íslenskra karlmanna fremja kynferðisglæp ár hvert og um 0,2 prósent karlmanna með erlent ríkisfang. Rétt er að geta þess að þá er miðað við þann fjölda erlendra karlmanna sem hefur búsetu hér á landi en ekki er tekið tillit til þess að fjöldi karlmanna heimsækir Ísland ár hvert.

Á þessu ári einu hafa um 400 þúsund ferðamenn komið til landsins og ef gert er ráð fyrir því að um helmingur þeirra séu karlmenn. Þá er hægt að segja að það sé í raun mun sjaldgæfara að karlmaður sem hefur erlent ríkisfang fremji kynferðisglæp hér á landi heldur en að íslenskur karlmaður geri það.

Enn er langalgengast að kynferðisglæpur eigi sér stað í heimahúsi og enn kæra aðeins um 6 prósent kvenna og 8 prósent karla kynferðisbrot til lögreglu að því er rannsóknir sýna. Samkvæmt tölum Ríkislögreglustjóra þá hefur kærðum kynferðisglæpum fækkað frá árinu 2005 þegar kærurnar voru 240. Í fyrra 230 slík mál kærð til lögreglu og í ár eru kærurnar 234.