Segir Svandísi hafa verið með gjörtapað mál

Svandís Svavarsdóttir, borgarfulltrúi Vinstri grænna, var fyrirfram með gjörtapað mál á hendur Orkuveitu Reykjavíkur að mati Daggar Pálsdóttur, hæstaréttarlögmanns og varaþingmanns Sjálfstæðisflokksins. Hún segir ljóst að Svandís hafi aldrei haft lögvarða hagsmuni af því að fá dóm í málinu.

Gengið var frá sátt í máli Svandísar Svavarsdóttur, borgarfulltrúa Vinstri grænna, á hendur Orkuveitu Reykjavíkur fyrir Héraðsdómi Reykjavíkur í gærmorgun. Í sáttinni felst að Orkuveitan viðurkenni að eigendafundur 3. október, þar sem samruni Reykjavík Energy Invest og Geysis Green Energyar samþykktur hafi verið ólögmætur. Í staðinn féll Svandís frá kröfu sinni um að ákvarðanir sem teknar voru á fundinum verði dæmdar ógildar. Ennfremur samþykkti Orkuveitan að greiða málskostnað Svandísar í málinu.

Dögg Pálsdóttir, hæstaréttarlögmaður og varaþingmaður Sjálfstæðisflokksins, gagnrýnir þessa sátt á heimasíðu sinni. Þar segir hún ljóst að frá upphafi hafi Svandís verið með gjörtapað mál. Segir hún að Svandís hafi knúið fram sáttina enda hafi hún ekki haft lögvarða hagsmuni af því að fá dóm í málinu. Ennfremur segir Dögg það óvenjulegt að Orkuveitan greiði málskostnað Svandísar.

Ragnar H. Hall, lögmaður Svandísar, gaf lítið fyrir gagnrýni Daggar í samtali við Fréttastofu. Sagði hann Dögg ekki hafa komið nálægt málinu sjálfu og því ekki í þeirri stöðu að gagnrýna það.