Þjóðskrá hyggst svara Guðmundi Bjarnasyni

„Guðmundi Bjarnasyni verður svarað fyrir vikulok," segir Skúli Guðmundsson, forstjóri Þjóðskrár. Guðmundur, sem er öryrki, segir að Þjóðskrá hafi einhliða tekið ákvörðun um að skrá lögheimili hans í Kína.

Sú ákvörðun hefur haft þær afleiðingar að Guðmundur hefur verið án bóta, er ekki sjúkratryggður hér á landi, fær ekki niðurgreidd lyf og á heldur ekki rétt á félagslegri þjónustu.

Lára V. Júlíusdóttir, lögmaður Guðmundar, hefur óskað eftir því að Þjóðskrá endurskoði ákvörðun sína. Þeirri beiðni hefur ekki verið svarað þótt fjórir mánuðir séu liðnir frá því hún var send. Um miðjan október sendi Umboðsmaður Alþingis Þjóðskrá erindi og spurði um stöðu málsins.

„Ég get ekki tjáð mig um málefni einstaklinga," sagði Skúli þegar blaðamaður Vísis innti hann eftir því hvers vegna erindi Guðmundar hefði enn ekki verið svarað. Hann vildi þó ítreka að málinu yrði svarað fyrir vikulok.